bungang makahilo

Nasuko ako sa akong higala;
Akong gitug-an, kasuko ko napapha.
Nasuko ako sa akong kaaway;
Akong giluom, kasuko ko milamay.

Ug gibisibisan ko kini sa kakulba
Adlaw'g gabii sa akong mga luha;
Ug gipatambok ko sa mga katawa
Ug mahawot nga lansis ug lingla.

Ug milipang kini gabii ug adlaw,
Hangtod namunga'g mansanas nga sinaw;
Ug nakita kini sa akong kaaway,
Ug siya nasayod nga kini akoay,

Ug misugok siya sa akong tanaman
Sa gabiing dulom ang kalangitan:
Pagkabuntag ako nakapanaghoy,
Kaaway ko nagbuy-od ilawom sa kahoy.

(gikan sa Iningles ni William Blake)

-- VICENTE VIVENCIO BANDILLO
Manila, Philippines