pagsunod sa badlis

1

Badlisan ni Tatay og lapis 

ang gipahigdang plywood

nga ubayan kanunay 

sa eskuwala kun di ba kaha 

ruler aron kuno wa'y sami, 

tul-id ug dili manobra 

kun mokuwang ba hinuon 

sa di pa niya hukman 

sa gabas ang mga gilatid 

nga kuhaon ug pormahon.

Ayohon niya'g siplit ang hiwid 

ug kurba sa kahoy, labtikan 

sa pitik ang balikog, adlipan 

sa sundang ang dagkong 

siwil, putlon ang gibukbok 

ug duna'y anay. Unya, 

sepilya na ang mosentensiya 

sa pagpahamis sa mga buko, 

pagtapan-pauoyon sa di 

malikayang ambihas, 

paghilot sa mga bungi-bungi,

pagpanipis sa baga 

aron mouyon kini sa tinabas. 

Iya dayong tandi-tandion 

ang gidak-on ug gitas-on

sa mga naputol ug nahinlo. 

Iyang sukod-sukoron kon 

unsa ang angayang pareson 

kay dili tanan mag-uyon, 

dili tanan mohaom ug 

kinahanglan pang alalayan 

niya sa tigib aron takdoon 

ang sukwahi, hipnoon 

ang misipyat ug tabingi.

2

Niadtong bata pa mi, 

ako lang ang gahi tudloan 

kon unsaon pagkat-on 

sa iyang pamanday, 

kon nganong kinahanglan 

nahong mahibaw-an 

ang patakaran sa sepilya, 

surutso, lansang ug kahoy 

nga hanas nang gibansay 

sa akong mga igsoon. 

Kanunay ko niyang sukdon 

sa pitik, metrosa ug tunton: 

maoy sagad nga hinungdan 

sa akong samad nga wa ko 

mahibawo kon unsang 

samara ang dugayng naayo 

ug kon unsa ang nagpabilin 

ngutngot kay motipas 

man ang ngipon sa surutso 

sa gipasubay niyang badlis 

sa gigabas nakong tabla. 

Madukdokan ang akong 

tudlo kon pugson ko niya'g 

palansang-- unsaon nga 

mopingis man ang akong 

karkulo sa tayming 

ug gibug-aton sa martilyo.

Kanunay ko niyang 

eskuwalahon aron mouyon 

sa gikutay niyang timaan. 

Kon way alibyo ang balaod 

sa linya, abyan ko niya'g 

metrosan aron iyang 

mabanabana ang tumoy 

ug utlanan sa akong 

pagka tawo ug gidamgo. 

Nganong di man ka kasunod? 

ang di nako malimtan niyang 

pangutana. Galisod ko'g pasabot 

niya kaniadto nga lahing 

matang sa pamanday 

ang gibadlis sa akong palad, 

lahing martilyo ug gabas 

ang uyon nga timbangon

ug latiron sa akong mga tudlo.

3

Paglabay sa pila ka bagyo

ug uwan, wa nako damhang 

hilom kong nakat-on 

sa gitudlo niyang pamaagi: 

hanas na ko sa pagbana-

bana sa gitas-on sa berso 

sa suwaton kong mga balak, 

kabesado na nako 

ang gibug-aton sa kahilom 

lakip na ang pagtugkad 

sa hagwas mga bituon

ug danguyngoy sa lasang 

sa daman ug kahigwaos,

lantip na ko sa paglimbas 

sa mga lingig sa bulok,

anad na ko sa pagsepilya 

sa mga hagashas 

nga hulagway sa di 

malikayang sugilanon.

4

Di kaha ni mohuot 

sa door jam? sugat niyang 

pangutana dihang miduol ko

samtang padayon niya

nga gipandayan og bag-o 

ang among karaan ug 

gabok nga pultahan 

nga mora ba'g ang iyang 

gibuhat mao ang pagsuta 

sa kalainan, pagsukod 

og balik sa nakalimtan, 

pag-usob sa naandan.

Tay, dili ka pakyason  

sa gisunod mong badlis. 

-- NOEL P. TUAZON
Dauis, Bohol, Philippines