pakigbisog

Karong hapona, sama sa makadaghang higayon, napakyas na usab ako sa pag-abog

       sa adlaw balik ngadto sa sidlakan. Wala pa mahuman ang buot kong buhaton 

           nga balak, apan ang kape sa tasa hapit na tawon mahurot, ug ang papel, 

                napuno na sa kinurisang mga pulong nga di haom sa paghulagway

                        sa atong mga damgo alang sa kaugmaon sa atong nasod.

                             Kanus-a pa kaha adunay igong panahon, bisag usa

                                   ra ka gutlo, nga way laing unod kining akong

                                         hunahuna apan ikaw ra, ug sa imong

                                             kasing-kasing, ako ra? Apan kay

                                                  kita nakigbisog, ang atong

                                                      gugma mosubida sab

                                                           sa mga bungtod.

                                                                Antos lang.

                                                                    Hapit

                                                                       na.

-- PAUL RANDY P. GUMANAO

Kidapawan City, North Cotabato, Philippines