dinhi diin kita nahidangat

dinhi diin kita nahidangat

halayo sa balhiboon nga hustisya

hagip-ot ang lawak

linapi ang mga bungbong niini nga sarang 

himoong panglansis sa mga saad

apan sa atong paglusad sa tugkaran

ila kitang gisabwagan og kahayag nga hapdos 

sa atong mga mata

nga dugay nang gilaming sa kangitngit

unsay kapuslanan niini

gamiton ba kini aron matanggong ako

alang sa lain na usab nga litaniya sa mga pangutana

ang mga pasangil dinhi

naghubit sa karaan kong kinabuhi 

mga kalapasan nga mahimong ipahid ni bisan kinsa

apan dili kini mao ang sumbong batok kanako karon

mao nga sayod ako nga dili magkadimao 

ang akong mga tubag

apan andam ako nga sukitsukiton 

atubangan sa katawhan

andam ako sa panghimaraot ug biaybiay

mapasalamaton ako sa tabang

sa tinuod lang nahimuot ako nga nagpalandong

sa kahigayonan nga mapugos ako

sa paghinumdom

-- VICENTE VIVENCIO BANDILLO

Dhaka, Bangladesh