sa may baybayon sa phuket, 10 ka tuig gikan sa nahitabong tsunami

Hunghong sa mga balod: kalimti

ang akong kaisog.

Ang akong paghasmag

sa inyong mga gipuy-an-- usa lang

kadto ka adlaw sa atong dili maihap

nga panag-uban. Tan-awa

ang baybayon nagpabiling

putli sa pagpaabot

sa imong pagbalik. Ako

andam sa paghalok

bisan kutob lang sa imong mga tunob,

bisan hangtod lang sa imong mga lapa-lapa.

-- DELORA SALES-SIMBAJON

Butuan City, Agusan del Norte, Philippines