Nangurog ang akong kamot nga giiwagan
Sa pikas nga Buwan samtang gihapyod-hapyod
Ang nangagkot nga buhok ni Nanay.
Giatangan namo ang imong pamayhon
Nga magdali pagsaka sa hagdan.
Gihandom nga madungog ang dahunog
Sa de kahon mong motorsiklo
Sama sa otso kabalyos nga Robin.
Kay gusto na namong mahanggap
Ang kahumot sa dugo
Sa tulingan nga giputos sa selopen.
Apan, wala… wala ka pa.
Gisulog-sulog na hinuon kami
Sa nagbilar nga mga gangis kay sa langit
Wala magpatim-aw ang North Star
Ug nagpaabot sa lapyahan
Ang Seven Star.
Hangtod gipadpad ang kahinam
Dihang ang among mga dalunggan
Gikulitog sa mensahe nga gitangag
Sa bugnawng hangin.
Ayaw kamo'g kabalaka--
Nahutdan lang ko'g gasolina.
-- ELEAZAR T. ACAMPADO
San Jose del Monte City, Bulacan, Philippines
No comments:
Post a Comment