usa ka hapon sa abril

nalawos ang kahumayan

nabantok ang tunaan

walay kabaw

walay mamakero

apan nagpabiling nagbarog

ang pughaw nga tawo-tawo

gialirongan sa mga saag

nga tulabong

-- GRATIAN PAUL R. TIDOR

Dipolog City, Philippines

berano blues

i

ang kabanha sa konduktor

nga nanawag og pasahero

gisumaysumay sa matag pagkagay

sa tagsingko'g tagmamiso

samtang nanampiling ang tigmaneho ning jeepney

nga gaaninaw ning huwaw sa mga estudyante

ii

kay nalansang man sa trabaho

ning buwan sa abril ug mayo

huwaton ko nalang sa facebook

ang iposte nimong retrato

diin ang adlaw midiyong

dihang gisud-ong imong katahom

iii

kuwang nalang magbukot og habol si kikay

ubos sa landong sa kalubihan sa baybay

wa gyod magpapiog sa naghingapin nga kaibog

sa gidalit nga kalipay ning dakong taob

mahal man ugod ang glutathione

mapupos ra sab dayon kanang bakasyon

-- IOANNES P. ARONG

Lapu-Lapu, Cebu, Philippines

liwat

karon pa ko nasayod 

nganong si tatay  kaniadto 

kanunay hubog ug kon masukamod 

patindogon ra pagbalik padayon 

sa kusina aron pahigopon og sabaw 

sa kamunggay ug kon magsuka 

limpyohan ra pod dayon

ni nanay nga dili lang magtingog 

ug kon nganong kanunay siya 

walay imik ang tubag ania punting 

kanako kay ako sama ra baya

anang gamot sa dakong kahoy

karon pa pod ko nasayod nganong

nangatagak ang mga dahon ug nahanaw  

ang kabugnaw sa landong

-- RIC S. BASTASA

Katipunan, Zamboanga del Norte, Philippines

balakak

naay hawod lang mo-69 

og mga pulong ug maayong

mobalista og paklayon

balasakan sa atik

balakasi nga lagsik

-- DONZKIE B. ATON

Bagtik, San Remigio, Cebu

gikan sa balilihan

Gadasok ibabaw sa hawanan ang lalis

Samtang gakayuring ang mga langgam.

Sa kilid, gapanilap  ang mga yamog.

Naamang ang balilihan, gikamang 

Sa kahilom sa mga wati. Taliwa sa agianan

Nga espaltado, lupig pa'y gibansay nila

Ang paghalok ug pagtanday tadlas 

Sa pikas tampi… Kahinay sa kinabuhi!

Kadali rang tukbon sa mga gakamang.

Kasayon ra nilang tumban labi na 

Kon dili ta magsusi sa atong mga lakang.  

-- DENNIS S. SARMIENTO

Baltimore County, Maryland, USA 

nganong wala ko nikuyog nimo larga balik sa syudad

kang Chinggay

sama sa mga pawikan

sayod kong ato rang balikan ang baybayon

busa dili na ko 

magpadala sa sulog

motadlas og mga lawod

magpaabot og katuigan bisan ugma dayon 

gikan sa imong pagbiya

mahimo pod nga mahanaw ang baybayon

sa pagbalik sa pawikan

-- JESSREL E. GILBUENA
Bantayan, Cebu, Philippines

jet lag: circadian rhythm disorder

nalisoan sa utok gimad-an sa alamag sulod subok sa lawasnong taknaan

nabali ug gimino ang pag-abot  ug pagtalikod sa panghuy-ab paghagok

ug pangigham sa nagtikawtikaw nga pantasma sa nanghinambid nga manlalawig

ang sireno  sa nagdaling tren nakigduhawit  sa busina sa langayang barko

impostor ang landong  ug anino sa bulan kon adlaw sa kagiw nga kahiladman

napislango ang paghunas paglantong ug pagtaob sa udtong kating tungang gabii

sa paghigmata ug paghinanok sa gatuwad ug gibaliwng latagawng' kahimatngon:

bangon aron mohigda na magpapanawng irongbuang 

-- MELQUIADITO M. ALLEGO

Lake Charles, Louisiana, USA

siklot

Didto sa balwarte

sagad tang magsiklot.

Ilawom sa buwan 

ug mga bituon, ihiklad nato 

ang tinipigang mga buskay.

Ang mga balod 

magpanghawid sa kabatoan,

mahilom ang mga pispis

lakip na ang mga takla 

ug agukoy sa baybayon. 

Maghunghonganay usab

ang mga dahon sa dapdap

sa dila sa amihan. 

Maamang ang dagat. 

Kay kinsa ba ang dili 

maaghat pagpaminaw

sa imong agik-ik, 

mamati sa imong katawa,

kon badlisan ko na 

ang gay-ang 

taliwa sa nagduol, 

nagtupad nga buskay 

sa akong tudlo. 

Maukay ang panon 

sa mga kasag sa bunbon, 

magkaguliyaw 

ang sitsit sa kamingaw. 

Unsaon, 

anad kaayo kang   

mosapupo-sigpo

sa mga buskay: 

isabwag ang kinumkom,

tapokon ang nagkatag, 

lingkiton ang gilay-on ug 

gidul-on sa kahinam. 

Magtalay-talay

ang atong kalimutaw, 

malatay-latay

ang atong dagpi  

sa kalipayng napalgan

matag litik-pitik nato 

sa tudlog gutlo, 

labi nag moingon ka'g, 

“      "Tikasan, uy!”

Kalit mohagtos 

ang atong miungot 

nga bahakhak. 

-- NOEL P. TUAZON

Dauis, Bohol, Philippines

ang kaluwasan pinaagi sa pak-an nga mubo'g lupad

Dili nako hinulsolan ang panagtakdo sa atong pagkasaag.  

Wala'y wali nga labaw nakong tuhoan samtang giludhan nimo 

Ang hilanat sa akong gahubag nga kauhaw. Pastilan, day!

Pasalamatan nako ang imong kabangis pagsuyop bisan 

Sa salibo gikan sa galiti nilang mga tamay. Wala ka motalaw

Bisan kapila mangamras ang kaulaw. Pikatan nako ang pari

Hangtod mabuta siya ug makaplagan na gyod ang gililong

Nga mga langob sa iyang panon. Diha sa bungbong nga bato,

Diin isab-it ang ilang mga maskara, basin madunggan niya

Ang gasubli nga aguroy sa ilang pagbudhi nga igo kaayong 

Moduyog sa atong agulo. Ug kon ang iyang pagkapkap

Magunitan nimo, basin pa diay mahikapan pod niya 

Ang pagkutkot nila sa imong mga samad hulip sa mga pako 

Nga ilang gibitad, gilaksi. Tudloi sila kon unsaon pagpagaan

Bisan gabawod ang kabug-at sa balik-balik nga pagkahayang. 

Tultoli sila sa ilang kangiob hangtod mahayagan sila 

Ug makat-on sa imong pagpaubos. Basin mapasaylo pod nila 

Ang pagtalikod sa ilang manulunda. Nibiya, wala nakaantos. 

-- MICHAEL U. OBENIETA 

Topeka, Kansas, USA

balak sa kubal sa bulak

ang imong pangan nga giukit nako sa hagkot 

nga handomanan gitugkan na gyod og gamot

kining hardin sa balak sulod sa akong lawak

mamungingi na unya sa imong mga agak-ak

samtang padayon ko sa akong pasumbingay  

kabahin sa atong mga nangalarag nga gihay

-- LESLIE S. NUÑEZ

Compostela, Cebu, Philippines  

sumpa sa subaw

Pangga, ipasul-ob na lang kaha nato ni Isaias ang bag-ong pajama dinhi sa hinangyoan tang lawak kay, tan-awa, sukad pa sa atong paghigmata, subay sa mga sinumpayan sa lawanit nga kisame walay puas ang kompas nga pagpangatagak sa bugnawng mga singot sa langit. Sa tinuoray lang, kanus-a pa kaha—bisan pa man sa atong pagsalikway sa kakapoy ug kaligutgot— mahitugdon pag-usab sa nipis nga kahayag ang pahina diin nahipatik kining tanan?

-- VICENTE VIVENCIO BANDILLO

Dhaka, Bangladesh

ang bunga

i

Gikuykoy ko ang yuta. Wa’y puas 

Ang pagdahili sa bukid ug pagyagyag 

Sa lingla ning akong palad.

ii

Daw aso nga kumkomon ang gun-ob 

Sa huyohoy. Napusgay, nag-alindasay

Ang salingsing sa umaabot.

iii

Giwarawara nako ang gapnod. 

Mituyhakaw ang bangaw. Nahaw-ang

Ang tubod sa kahingawa.  

-- FELICISIMO BOLONOS 

Talamban, Cebu, Philippines

andalusia

Ug ang tanan usa ka hulagway sa handurawan 

Komo ang ubasan nikurog sa sumpaki sa awit 

Ug kahilom. Nangandoy ko sa nahanaw nga 

Mutya sa akong kapudpud-an. Ang templo mao'y 

Bintana sa moske ug ganghaan sa Katedral. 

Hangtod karon wala ko kakita sa nagkabayo 

Diha sa bungtod. Bisan ang kalag ni Federico, 

Wala, si Azahara naa kanunay sa akong damgo. 

Sanglit ako ra'y nagsulti alang sa kaugalingon, 

Nagpabilin kung hubog sa pagsugilon sa kasakit. 

Diha sa sidlakan anaa ang suba sa kalimot ug 

Diha sa kasadpan ang hardin sa panginahanglan

Nga lawasnon. Diri ko nakaamgo sa kahingpitan

Sa kamatayon ug ang kahinungdanon ini 

Sa kinabuhi. Bitaw, madungan gihapon nako 

Ang gaagas nga tubig gikan sa sagidlisan

Nga karaan. Padayon ang kamingaw sa maya,

Nagbatog sa kawayan didto sa among isla. 

-- SIMON ANTON NINO DIEGO BAENA

Bais City, Negros Oriental, Philippines

make-up

Hala, day, kagwapa ba nimo! 

Pahulma ko anang gipintal 

sa imong dagway bi. Hapit na baya 

ang kagabhion. Nangatol na pod 

akong tiil padulong sa Colon.

Sige na ba! Apir bi! 

Basin lingion na gyod tawon ko

samtang magdahom nga ako ra 

ang bugtong anak sa Ginoo!

-- JEFF DEL ROSARIO

Maslog, Danao City, Philippines

koi no yokan: alang kang krishna hari

“There's no sound but the engine's drone/ our minds set free to roam. Time shifting./  We discover the entry to other planes” — Rosemary, Deftones

Sa wala pa gimugna ang balak,

anaa ang hangin nga gihuyop 

sa abogon nga kahaponon sa atong dunggan. 

Sama sa kanihit sa mga hupaw ug sa mga kalit 

nga panil-ip, tipik lang sa handuraw 

ang atong mahinumdom niadtong mga higayon 

sa atong panagtabo. Sa wala pa 

gimugna ang balak, anaa ang mga pulong 

nga sagad natong gipadayag sa isig-usa.

Gawas niana, igo lang ta nga mikompisal

sa hangin sa buot natong isulti ug igo lang dayon 

ipadpad sa panahon. Bisan tuod gilubong ra nato 

sa kalimot, wala kita nagdahom nga 

natanom ra diay sa kahiladman. Daw wala'y 

rima o rason, kini niturok. Nitubo hangtod 

sa pag-abot niining kagabhion. Sa usa 

ka lingi, namuwak na ang imong tinan-awan

diin mapalgan akong kaugalingon nga gisamin 

sa imong kalimutaw. Sa wala pa 

gimugna ang balak, nagkamubo 

ang atong panagtabi samtang ang kalibotan 

nag-anam og kagamay. Ug sarang na

ang pag-aninaw nako sa kahilom nga gaaso 

sa ginhawaan hangtod mahimo kong yamog 

nga gatulo gikan sa mga gihay 

sa umaabot nga kaadlawon.

-- TON DAPOSALA

Cagayan de Oro City, Philippines 

kanimo, emma watson, sa imong adlawng natawhan (04-15)

i

ayaw ko tan-awa og ingon niana

nasayod ka na baya

kanang imong tinan-awan

bawod nga molukot sa akong ginhawaan

lilo nga molambod sa akong kaugatan

bagyo nga mopamala sa akong tutonlan

ayaw lagi ko tan-awa og ingon niana

nasayod ka na baya

kanang imong tinan-awan

liti nga moduslit sa pabilo

sa libo ka libong dinamita

nga karon nagpaka-paka na

sa hagip-ot nga hawanan

ning nasiging-siging kong dughan

ii

may gahom imong tinan-awan

pagtisok og kinabuhi

sa nag-ukon-ukon kong pagbati

may kainit imong tinan-awan nga milamoy

sa tanang katahap ug katalaw

niadtong una tang nanuroy

unsang matanga sa hipnotismo

yamyam orasyon o ba kaha mino

nga mibukal man ang dugo

sa akong pagka-ungo

tan-awa ko pinangga

nianang imong tinan-awan

nga dunay gahom paghugas

sa tanan kong kalapasan

balik-balika ko pagtan-aw ga

nianang imong tinan-awan

nga makawagtang sa tanan kong gikahadlokan

tanang gikasilagan tanang gihilakan

-- IOANNES P. ARONG
Lapu-Lapu, Cebu, Philippines

hubad sa 'florida poem' ni Emma Trelles

Nunot sa mga ulan sa ting-init,

mga marmol nga kumagkong' umang ug bakukang

magpunsisok sa mga tabil sa tamboanan

uban sa mga perlas ug buyog. Mga gardenya mosupang,

ang pagginhawa tubigon ug molawig 

sa halayo nga pagsulting' pinaluray gikan sa kama ngadto  sa kalibotan.

Atol sa hulaw,

ang kainit mahimong demonyo

babaye nga duna'y abohan-pula nga mga ngabil

nga buot tapokon ang mga tipik sa utok

sa gitabona'g bronse nga tadyaw

nga nangandoy mohubo sa pilak

gikan sa imong dila, ang pulso sa kagabhion 

taliwala sa imong paa, bitaw, angkonon niya 

ang tanan gikan kanimo.

-- MELQUIADITO M. ALLEGO

Islamorada, Key West, Florida, USA

latagaw: balos sa balak ni Rene Estrella Amper nga giuloha'g “letter to pedro, u.s. citizen, also called pete”

Higalang Osting, bugnaw sama sa niyebe

ang hapuhap sa kamingaw sa yutang gitalikdan. 

Matag buntag, modupa nga pako ang pagbati

aron luparon og balik ang panumdoman.

Usa ka daman kining akong paglangyaw,

o maingon ta'g usa ka laaw nga pakigbisog

tungod lamang sa di manganlang latagaw.

Unsang matanga sa pagkaon ang motandog

sa kasingkasing nga gutom sa paghandom?

Ang burger, pizza? Kun, di ba kaha, ang pulaw

nga suga sa New York o ang uga nga pahiyom

sa way ngalang anino ug haghag nga panagway?

Mga samad ug uwat lamang sa kalag ug dila

ang wa'y kapaingnang pagtakoban sa tanghaga.

-- NOEL P. TUAZON

Dauis, Bohol, Philippines

duha ka balak bahin sa pagpamalak

1

Ang bulak

usa ka bulak

bisan kon asa

mobuklad.

Ug ang katahom

magpabiling katahom

bisag way mga mata

nga magtan-aw.

Apan ang balak

dili balak

kon way matandog

nga magbabasa.

2

Sa iyang balak,

American Sermon,

Si Jim Harrison nagsulat:

“Ang higala kong si Sam

may kita nga kinyentos ka dolyar

sulod sa 40 anyos

nga pagpanulat og mga balak.”

Apan kon dunay moingon

nga si Sam usa ka kapakyas,

ako dili mouyon.

Kay ang pagpanulat og mga balak

di kabilhan.

-- URIAS A. ALMAGRO

New Berlin, Wisconsin, USA

naalihan

Nahinumdom ka pa ba

kon kapila nimo gipusdak ang plato

sa lamesa samtang si Nonoy gakurog 

nga nitago sa akong saya?

Nahinumdom ka pa ba

kon kapila ko naugtas

sa danguyngoy nga pagdumili 

sa imong pakighilawas?

Kon makahinumdom ka kon 

nganong angay kang kalimtan 

basin og makat-on pa diay unya mi

pag-abli balik sa ganghaan.

-- JONDY M. ARPILLEDA

Tandag City, Surigao del Sur, Philippines

gilak

ang kawanangan nahimong

sab-itanan sa mga bituon

ang papel nga wala pa masulati

duhikan ko sa mga pulong

aron unya mahimo na usab kini

nga usa ka laing wanang

ug dayon anaa na usab dayag

ang gagilak nga mga bituon

-- RIC S. BASTASA

Katipunan, Zamboanga del Norte, Philippines

pagbiya

may higayon nga ang kalibotan  

makigduyog sa atong kasakit sama 

pananglit sa pagkagisi sa dagat

sa pagtadlas sa lantsa 

-- JESSREL E. GILBUENA

Bantayan, Cebu, Philippines

hubad sa iningles ni César Ruiz Aquino

Walay Timik

Ilawom sa balay daplin 

sa baybayon, duha 

ka gagmayng bata.

Gikulob ang sakayan.

-- VICENTE VIVENCIO BANDILLO

Dhaka, Bangladesh

pagpailob

Ug nisiga ang cell phone

Apan wa nitingog.

Naa'y nitawag,

Naa'y ni-text…

Nabungol na ang tag-iya.

-- SHERLANE KATE T. LALUNA

Sibonga, Cebu, Philippines

libak batok sa balik-balik nga mga balita

nagbawod ang itom

naanod ang mga pako

nisawom nalumos 

sa akong kape ang lamok nga nipilit 

sa akong dila dihang giyarok nako 

ang kabugnaw sa paghuwat kon kanus-a 

mopiyong ang gianuos ug gapula 

nga mata sa unos 

naghayanghayang

nga nanghimuta ang wala nay pulos 

nga mga manulonda sukad wala nay

gibantayan ug karon manghilam-os na 

og aso sa mga bakho gikan 

sa mga gatukaw samtang

gianod ang mga pako

sa itom nga mga bawod

-- MICHAEL U. OBENIETA 

Topeka, Kansas, USA

sa umaabot

Gikamras sa akong panglangtaw

ang umaabot kong panahon

nga nanghingapin sa kabalaka--  usa ka lit-ag sa damgo

nga malimbongon. Kining pangandoy nga gihampak 

sa mithi nga maluibon. Daw balod 

nga wala'y lapyahan...

Gihanggab ko ang wa’y sukod nakong kaagi apan

milukso ang pagbasol nga dalin-as 

sa danguyngoy. Ubos sa dag-om 

sa paghanduraw, nagkapuliki ko 

tadlas sa suba gikan sa tubod sa tingosbawan hangtod 

ugma damlag sa pahiyom duyog sa pagbuto 

sa liso sa paglaom.

-- FELICISIMO BOLONOS 

Talamban, Cebu, Philippines

kagawasan

Makaunom na gatuyok ang kamot 

sa orasan-- daw dili pod moundang 

ang nadunggan nakong tyabaw.

Bisan motikig pa ang tanang butang,

labi na sa kalad-ang ning kinabuhi,

padayon ang pagdis-og sa kalibotan.

Ug bisan asa pang dapita mapadpad

kining galatagaw nga hunahuna, 

dili gyod kini sama sa usa ka maya

nga gikan gatuhik-tuhik sa dalag 

nga kapayas ning hapona, magpabilin

sa lutaw nga lit-ag sa hangin.

-- ADONIS R. ENRICUSO

Dumingag, Zamboanga del Sur, Philippines

bersikulo alang sa usa ka kriminal

Kon masukod pa sa langit ang sungo sa uwak nga mingtikmitikmi sa imong kalimutaw, hangdon kaha ka sa nagkabulingit nga wati sukad natugkad sa imong kaugalingong hugaw ang katagbawan niini? Pwera buyag, ang bungot ni Hudas (mangtas sama nimo) mas lumoy pa sa lupoy pinaisan nga gihalad sa santo nga wa nailhan samtang nagrosaryo ang tiguwang, nanalangin og kaluwasan sa imong kalag. 

Gabiing dako. Nahimuot ang usa ka bayot sa gipagwapahan nga anghel-anghel nga mao unya'y mobayaw sa Maayong Balita unyang kaadlawon sa panagsugat sa Birhen ug ni Hesus. Mahibal-an ra pod nga ang imong mga sala, sa gikaingon pa ni Kristo, mapasaylo ra gihapon og kapitoan ug kapito.

-- LESLIE S. NUÑEZ

Compostela, Cebu, Philippines  

exploding head syndrome

Samtang nahinanok takulahaw lang adunay mobuak sa ulo

Mangakay-ag ang mga tipaka sa pakanganan ug martilyo

Mitimbakuwas nahigmata ko gikan sa dinamitang damgo

-- MELQUIADITO M. ALLEGO

Dade Battlefield, Florida, USA

eskina

Nawani 

ang buwan

sa sulirat 

sa mga suga

sa dagkong 

motel

tindahan 

ug kalsada

diin hagawhaw 

ang katawa

sa mga batang 

nagbato-lata

-- NOEL P. TUAZON

Dauis, Bohol, Philippines