kataposang ting-init

Hilom na, akong Mahal,

bisan ang bituon

matagak sa imong aping.

Dili lang ting-uwan

ang umaabot nga Hunyo.

Adyos, Pinalangga,

dili puro gakos

ang pagbati.

Makat-on unta kita

sa mga alibangbang.

Maghuwat, Hinigugma,

kanunayng ting-init

ang kiay sa mga buwak.

Tagulaylay ang mangloy

sa kasingkasing nga luyloy. 

Pasagdi, akong bathala,

Padad-an lagi tika'g

postcard nga niyebe.

Kamig ang hapyod sa London,

dili unta ko sip-onon. 

-- NOEL P. TUAZON

Dauis, Bohol, Philippines