1963, atol adtong ulan

Ang gigikanan sa daklit nga paghandom

Kapin na sa tunga sa siglo ang milabay.

Naglakaw ako niadto sa Jones Avenue

Kuyog sa akong suod nga higala nga

Ning panahona dugay nang nahimong

Mananambal ug karon atua

Sa America.

Samtang nagpadayon kami sa among paglakaw

kalit mibundak ang makusog nga ulan--

Ang mga tawo nagkatibulaag pagpanagan

Aron mangita’g kapasilongan

Apan kami among gisum-ok

Ang ulan: mga kwerdas nga naghuni,

Ang hinaganas tulunggon sa awit.

Ning bag-o sa iyang pagduaw sa Sugbo

Midalikyat siya’g pangutana nako:

"Eddie Boy, wa ka pa ba malimot niadtong   

Ulan nga atong gisum-ok?"

Diha baya’y balak wa'y hilom. 
Ug nia’y pahiyom. 

-- EDFER  C.  RIGODON                                                                                                                 San Fernando, Cebu, Philippines