lapas sa kaadlawon

Samtang hilom nga gaalirong

ang kabugnaw— kining nabahaw 

nga salin sa kagab-ihon— gahinay-

hinay pod og huyatid ang sidlakan 

duyog sa paugat sa sunoy .

Gahagok pa ang kahaw-ang

sa lawak. Gahuwat pa intawon ko

sa nasaag nga kahinanok samtang

gaandar pa ang tambutso lahos

taliwala sa akong duha 

ka dunggan, kining biniyaan nga

kanaas, gasubay sa hangin 

nga gaapas kanimo…

-- R.L. BERTULFO                                                                                                                            Talisay City, Cebu, Philippines