ritrato

Uy, ritrato ni Imelda, kagwapa gyod niya.

Ug iyang mga anak, uy, kahamis, kahimsog,
klarong wa gyod moagi’g gutom.
Iyang bana, kadtong Ilokano ba, tan-awa,
harianon kaayo og dagway. Hawod to siya,
iyang gisakop ang bug-os nasod, wa’y nakapalag.
Hapit baynti anyos siyang naghari-hari kanato.
Ang mando niadtong Ilokano mao’y atong balaod,
yango tang tanan, huwes, kargador, pilosopo,
sundalo, labaw na gyod ang sundalo.
Wa’y reklamo, kay ang motutol
mahanaw lang mora’g aso.
Ubay-ubay tong nakatagamtam sa iyang kapintas,
gipang-ilogan sa katigayonan, gibawian sa pwesto,
gipreso, gipangmatay ang di maihap nga mosupak.
Pilo-pilo ang utang sa bayan apan piot
ang panginabuhi sa mga pobre, gamay’g sweldo,
lisod ang panarbaho. Adtong panahona hinoon,
si Imelda pataka ra’g pangompra, sapatos, alahas,
bestida, ug unsa pa. Loho ilang panginabuhi,
kay nakatag-iya man. Tan-awa ilang dagway
anang ritratoha, piskay kaayo, mora’g mga diwata
nga way kamatayon. Apan baya, no,
ang pailob sa tawo may sukod, pag-abot sa takos,
matod pa sa atong mga tigulang, kalison.
Gisuka ra sad sa nasod ang Ilokano
ug ang iyang rayna nga si Imelda.
Tutoki’g maayo nang ritratoha, pagbantay mo,
kay ilang kaliwat gakamang na sad paduong
sa trono nga ilang giangkon nga katungod.

Ay, Pilipinas, tigoma na ang imong mga anak,
daliti sila sa mga awit sa imong kaagi,
paimna sila sa apdo sa imong kasakit,
buhia ang kaisog ug katin-aw sa tanlag,
ipaugom kanila ang punyal ug bala,
ug pangandam, pangandam, pangandam
sa pagbusagak sa adlaw sa kasilag.

-- MERLIE W. ALUNAN                                                                                                                         
Tacloban City, Leyte, Philippines