pamaagi sa paghikog

Ilabay ang pisi.

Buhii ang kutsilyo.

Hiposa ang pusil.

Kining tanan

sagad nang gigamit sa uban.

Di ba laay ang ginabalik-balik

ug kon unsa’y naandan?

Hinuon, higugmaa siya.

Siya nga sayod ka sa sinugdanan

dili angay higugmaon.

Siya nga wala

mahigugma kanimo.

Higugmaa siya sa hingpit nga katakos.

Ingon sa wala ka’y kahadlok.

Sama adtong sa makadaghang higayon

nga ikaw misuway pag-ambak gikan 

sa kinatas-ang andanas. Imong dughan 

natagak, nabuak.

-- MANUEL M. AVENIDO, JR.                                                                                                     Talibon, Bohol, Philippines