sorbetero

Malinawon ra baya unta kong nagbinugtong

og inom, sama sa naandan, apan kalit

nga misurok ang akong dugo sa kasina

dihang akong naalinggatan, lusot

sa bildong bungbong sa imnanan,

ang yawan-ong tingsi sa tigulang sorbetero

nga nagsud-ong sa tsik (nga malagmit

naghulat og dyip kay nahiugbok man lang

sa daplin sa kalsada) nga nagpupahiyom

inubanan sa pagsulirap sa mata samtang

ganadong gatilap-tilap sa ube flavor

nga scoop sa gaugdong ice cream cone

nga gipalit gikan kaniya—nga mao pa lay

paghuman og pangihi sa likod sa poste.

-- VICENTE VIVENCIO BANDILLO                                                                                             Dhaka, Bangladesh