dakpon ko unta pagbalik ang alimyon

Ang kahumot sa durian dinhi sa Magsaysay maoy mibinat nako 

kaniadtong nagkuyog pa tang duha. Wala nato mahurot og kaon 

ang usa ka tres kilos nga puyat. Nangatawa, gitamuy-tamoyan ta 

ang atong mga tudlo. Wala panumbalinga ang mga lumalabay—

mga sakyanang pasaheroan, ang mga nanindahay nga nanan-aw 

sa atong pagkab-ot sa panganod adtong higayona. Pagkalayo…   

Mao tingaling wala na hinuon nato namatikdi ang mga tunok--  

ang katalinis lapos sa akong kalag. Bisan bug-at ang katam-is

apan gianod-anod gihapon kini sa hangin paingon sa kasadpan.

-- JOVANIE B. GARAY 

San Isidro, Davao Oriental, Philippines