Mga abo sa karaang mga kalayo nakahig na,
nakatag diha sa upat ka alimpulos, nabulhot padulong sa langit.
Ang mga kaldero sa humay gikiskisan na, gibali ug gipauga,
ang berdeng sabaw
gibutangan og sangig ug panakot,
humot nga tanglad.
Duna unyay nag-asong imnonong luy-a
mohupay sa tiyan nga puno sa hangin
human sa layo kaayo nga paglabang. Hinaot unta
nga ang mga panganod sa bukid sa Danglay mahilis
inigsarap sa mga pakong puthaw
gikan sa amihan nga magngulob
magdala nimo kanamo.
Giandaman tika og kwarto dinhi
diin ang krus sa simboryo milit-ag sa gabhiong langgam
iniglihay nila gikan sa sidlak sa adlaw.
Apan hinaot makasabot ka nga dunay mga nag-unang katungod –
ang samokang iro nga mitaltag sa iyang mga balhibo
sa pultahan, ang iring nga diha matulog
sa nahibiling maayong lingkoranan, dili sila pwedeng balhinon.
Dili ang mga kaka, alibangbang, kwaknit
mga tiking nagtiniktik sa ilang gitaptan
diha sa bungbong, ang langgam nga nagsalag
sa nag-inusarang kahoy sa nataran.
May balhiboong nag-gwardya sa bungtod sa Hurao
madagtom o mahayag ang bulan
may pilak nga bayeng kabayo nga nanibsib sa Kangkabatok Bay,
bisag walay nakakita niini.
Ug nagyunyon sa kawayanan
ang pak-a’g itom nga babayeng moinat sa iyang dila
og layo, layo kaayo hangtod sa upat ka alimpulos – iyang gitilaan
ang mga panganod, ug kay nakasimhot sa langyaw nga nagkaduol,
milipot sa kurbada sa kalibotan ngadto sa iyang kiliran.
Ang mga bugoy sa panimalay akong gipahimangnoan
nga magpuyo diha sa dahon sa mga gabi sa luyo
sa likod sa silhig, o kaha sa puntod sa mga hulmigas
ilawom sa mga sugnod.
Ay, ambot lang og motuman ba sila.
kon dunay masaag sa imong gilaktan,
mokapyot sila morag amorseko sa imong karsones,
mosuksok sa imong bulsa, ug mouliot sa imong panit
nga dili nimo himatikdan. Pagbantay.
Mahimong dad-on ka nila ngadto diin gitagoan namo
ang tanan, tanan namong mga pangandoy, kaligutgot, kahadlok,
kahangol ug kasub-anan – mga uyamot salikwaot nga mga anak
sa among bangis nga mga gugma, hiwing pag-unong,
naghingutas nga mga paglaom. Dili angayng masayran sa usa ka langyaw.
Mahimong wala kay tuhoan niini.
Sigi lang. Paigo ba kaha ang among tinipigang mga pulong
pagsugid sa kalahi
sulod sa usa ka adlaw ug gabiing pagsugilon?
Iniglakaw nimo, niay usa ka tulo nga tuba.
Baliha ang imong bulsa, taltaga ang mga abog
sa imong mga tiil. Ayaw’g lingi
sa dihang ang kapunawpunawan mokurba pagdawat nimo
og balik sa imong tipik sa kalibotan.
Bag-ong mga sugilanon nagpuk-ong sa tinipigang panumduman.
(kinutlo gikan sa libro ni Alunan nga Amina Among the Angels)
-- ESTER TAPIA
Kathmandu, Nepal
No comments:
Post a Comment