hubad sa balak nga ‘woman of many words’ ni Merlie Alunan

Gihigugma niya siya sa mga pulong, nibunok. 

Gipanglabay niya ang mga pulong 

gikan sa tag-as nga mga edipisyo, 

gikan sa simboryo sa mga katedral, mga tumoy sa kapilya 

mga atop nga nipa sa kasaopan. Ang mga pulong 

nilukapa, nihungkagol, nisulbong, nituis-tuis 

nibiyobiyo ibabaw sa mga sin nga atop, 

mga pungkay sa kakahoyan, mga payong, 

nigitik sa dunggan sa mga bata ug sa mga iro 

mga elepante sa zoo, ug nipasayaaw nila, 

nihiwid ug nirampa, nisapaw 

sa mga suba ug lim-aw ug kadagatan, nisakay 

sa buko buko sa mga bao ug mga pawikan, ug ang balyenang 

nakadungog ni-alingawngaw niini sa mga dagat nga bugnaw ug lawom 

sa Antartika ug ang uban pang mga pulong nangahulog sa balas 

ug gikitkit sa mga kuyamang ug gikahig sa mga alimasag ngadto sa ilang mga tagoanan. 

walay paghubas ang iyang mga pulong ug sa ingon 

ang iyang dunggan napuno, mga pulong nibara sa iyang ilong, 

nidasok sa iyang bulsa, niburot sa ang iyang polo, 

nipigsik sa iyang sapatos, nigum-os 

sa iyang katre, karpet, sa lamesa asa siya nagduki-duki 

nipuno sa tanang tasa sa iyang kusina. 

Nangahulog sa mga kahoy sa iyang pagsuroy-suroy, 

walay hunong nga gitil-is sa kalanggman 

samtang nilupad sila gikan sa yuta ngadto sa kahoy ug balik sa yuta na usab. 

Baya, natagak ang mga pulong, walay kataposan sad iyang ulan, 

nisawom siya sa pagbaha niini, nihigop niini 

ug bisan pa og nahigugma siya kaniya, naghambin kaniya, 

ang mga pulong niluta sa iyang hunahuna ug nikawat sa iyang katulogon. 

(kinutlo sa libro ni Merlie Alunan nga From Tales of the Spider Woman, p. 17)

-- ESTER TAPIA 

Kathmandu, Nepal