kasingkasing

(sumala sa balak ni Paul Randy P. Gumanao  nga “Sa Higayong Ako Angoangohon”)

Basin isulti nako kanimo nga dili sama ang kasingkasing sa mga pulong

nga balik-balik, susama sa gugma-gugma nga mahimong mag-inusara

ang matag bahin ug aduna gihapoy kalabotan sa gamot ang púlong

nga mamugna sa pagbalik-balik; walay kaugalingong kahulogan 

ang kasing sa kasingkasing. Unsa may ipasabot niini? Ako. Ikaw, 

Kanang motuyok-tuyok diay nga dula-dulaan sa mga bata. Bata-bata 

gyod ka maong kinahanglang idungag, Kanang adunay kalabotan 

sa kasingkasing. Nga sama sila og hugis ug gidak-on, motuyok

sa imong pangutok. Nga dili kini tinuod, ang andam nakong itubag. 

Apan ang imong itubag, Sama silang adunay kataposan: ang kasing 

sa pagtuyok, ang kasingkasing sa paghigugma. Tugotan ko kini, ikaw,

imbes nga itudlo kanimo ang matarong nga pag-amgid (dili kini sama

sa imong mga gibasang balak nga kanunayong gugma ang hisgotan)

ug akong iampo nga ako angoangohon aron dili na nako atik-atikon

ang kaugalingon. Apan dili ko kapugong, Ug kinahanglang butangan 

og giyon ang mga pulong nga balik-balik; wala sa kasingkasing. Ikaw

kunohay apan ang tinuod, ako, Mabatian ba nimo ang giyon sa gugma-

gugma, tuyok-tuyok, dula-dula, ug atik-atik nga wala sa kasing-

kasing?

-- M.J. CAGUMBAY TUMAMAC

General Santos City, Philippines