Nanawag hangtod nanggakos na
Ang kangitngit. Gihapuhap ta
Sa iyang kabugnaw, nangagda
Nga kita manggawas.
Gidapit ta sa kinasingkasing
Nga pagsaksi sa subli nga obra
Simponiya. Pangandam, ania na:
Ang gilawgilaw sa mga bituon, bayolin.
Ang huyohoy sa hangin, cello.
Ang uswag sa mga kahoy, baho de arko.
Ang kasikas sa mga dahon, plawta.
Ang haring gangis, alpa.
Ang agunoy sa iro, trumpeta.
Ang dahunog sa yuta, timpani.
Ug ang kawanangan, entablado
Dili mabungol, dili mabuta
Ang nabulahan bisan sa panagsa
Nga paghangad-hangad kon unsa’y
Gihalad sa Kahitas-an.
-- R.L. BERTULFO
Talisay City, Cebu, Philippines
No comments:
Post a Comment