pag-ugkat

(paghinumdom sa mga nadat-ogan sa Manila Film Center, Nobyembre 1981)

Tan-awa, dili baya kinahanglan ang linog. Dayag 

bisan sa kinahabogan nga kabugnaw nga sagipo 

ang agipo sa mga bulkan samtang galanog-

lanog ang nahunlak nga dag-om. Tan-awa

ang awas nga lamaw— bukog, unod, dugo— ug

nganong kini malasaw ra, mayabo inig tay-og

sa tuboran sa mga bakho. Ug usab pamatia 

ang makapangag nga mga kagot duyog

sa mananabtan nga nanghuy-ab sa puol niyang 

pangandoy nga unta puhon siya maamang 

aron iyang masumpayan ug masabtan na gyod

ang kahilom sa giludhan. Bitaw, dili ta maglangas

kon buot natong molingkawas sa gakos sa huyong-

huyong. Dili ta magpagapos sa mga ulod 

nga mopabinhod lakip sa atong tabon-tabon 

kon dili ta mag-inabat og tukaw. Tutokan ta

ang mga santilmo bisan tay-ogon sa kakulba

ang atong kabukogan. Dili baya kinahanglan

nga magping-it. Bisan sulod sa sinehan, singgit lang 

og sunog kon ang salida mopataas ra sa lamat  

tugbang sa bangaw. Ihangad pod ang pagkulihad. 

-- MICHAEL U. OBENIETA 

Topeka, Kansas, USA