laylay

(balos sa balak ni Jae Mari Magdadaro nga “Nunot sa Imong Pangutana Kon Kinsa’y Una Natong Nakatulog sa Milabayng Gabii”)

Aron dili ka magduka, 

ayaw na paghago 

og paabot nako. 

Wala kay angay 

ikabalaka, ‘day 

basta ipakang-a lang 

kanang pultahan 

sa imong damgo. 

Sa kasamtangan, 

busog na ko sa mga hinog 

nga pasumbingay 

nga gatubo gikan 

sa lungsod diha

sa imong pusod. 

Natagbaw na ko sa atabay 

nga puno sa imong talidhay. 

Ug bisan tuod taas-taas pa

ang akong pagbaktas 

niining malamaton 

nga nataran, 

subayon ko lang 

kanang mapa 

nga gigama sa imong

pipila ka panghupaw. 

Kon ugaling masaag 

latason ko ang lasang 

sa imong buhok 

ug ang kahabog 

sa imong dughan

aron makadangat 

diha sa utlanan 

sa imong ngabil. 

Busa, langga,

ipakang-a lang ang pultahan 

sa dili pa ka mopiyong. 

Kay sa higayong 

maalimungawan ka, 

wala kay laing madunggan 

gawas sa akong hagok 

nga hagbay ra nakigduyog 

sa imong paghinanok. 

-- TON DAPOSALA

Cagayan de Oro City, Philippines