Ang banaba sa tugkaran gibugha
kay mikubkob ang gamot sa semento
ug miliki ang among agianan,
kay iyang mga sanga namulak
og til-as nga buot mohalok sa tiil,
kay iyang mga larag nga dahon
nagpunsisok na sa silong.
Karon nga wala na ang kahoy
nagmingaw mi kay walay motihol
walay bulak nga motimbaya
inigmata namo sa buntag
walay landong kapasilongan
sa ting-init sa among pagbati.
Pila pa kayha ka tuig paaboton
una molusot og usab ang mga lila
nga pahiyom sa adlaw
diha sa hamtong nga kahoy?
-- ERLINDA KINTANAR-ALBURO
Cebu City, Philippines
No comments:
Post a Comment