puzzle

(alang kang Dan)

1.

May mga triangulo sa bituon;

may mga pikas nga nawong sa bulan.

Ang mga karton nga gidasok

sa batang lalaki ug babaye

sa mga lungag, 

sa kawalaan,

mga bulok ug porma nga mohaom 

motim-aw lang 

kon mahulma, motunga

sa kaulahian.

Ang duha ka batang nagduwa

nagyaka ubos sa nitso sa ilang inahan.

2.

Tingali moabot ang panahon nga basig 

dili ko na mahimo ang pagsabot,

nga maminaw ko apan

wala ko’y madunggan

way silaba o ritmo 

nga masango sa akong dunggan 

o akong mailhan. 

Ang tubig mohaplos sa akong mga tudlo--

dili maihap nga mga tulo 

nga mosagop sa mga bapor ug sakayan

sa lawod--

nga dili ko mamatikdan,

molawig subay sa walay kataposang 

sirkulo sa kalibotan.

3.

Kon mangita ta’g mga sumbanan

ug moingon

mao kini ang linya sa silik sa bituon

o ang tabas sa mga konstelasyon

sa awit nga dili madutlan;

kon ang atong panan-aw mohabol 

sa nanagsumpaki, nagsapaw-sapaw 

nga kapunawpunawan,

ug dili ta malumsan sa akto   

sa pagsubay sa panahon;

kon magpakagamhanan ta 

ug kon malagbas nato ang tanang mga utlanan,

o kon matultolan ang topograpiya 

sa kahayag ug kangitngit;

makadakop sa matag tuno, kasikas,

nga nasangit sa matag kilab sa panahon–

makahatag og mga ngalan

nga nindot paminawon: Venus, Jupiter, kaluha;

sigon sa luwag sa atong kahibawo,

ug mopaila kanato sa kagamay sa luwag

sa atong kahibawo,

ning kawa nga dili matidlom.

4.

Ang batang lalaki ug babaye

seryoso kaayong nangita sa mga bahin sa puzzle,

diha sa kawad-on sa mga pulong,

kining pagpihig-pihig, 

kining pagsibo, 

pagsukod sa mga bulok ug porma

diha sa dili matugaw’ng takna,

kining tiunay nilang kabilin.

-- ESTER TAPIA 

Kathmandu, Nepal