ang lapis kong dragon

Du, mao ni ang Monggol nga Made in China, 

birit ko pa kaniadto sa akong mga classmate. 

Pinalit ning Mama sa eskina Sanciangko, 

buy-one-take-one ilang Ingko 

kadtong insik niwang magkamisin pirmi. 

Ingon ko, mas lig-on nis Staedtler ninyo! 

Tuod man, matag lunes, talhan na nako 

ang Dragon kong lapis. Humok kadto, 

mohait dayon makabota og itughit nakos 

mata ni Bong pikot nga sigeg 

panapog morag di mangopya. 

Di mahaponan, mohabol ang Dragon, 

talhan ko na pud og makausa kay 

show your solution ra ba kuno inig Math na. 

Ambot og tungod ba kay mahinumduman nako 

si Mama (nga lab-aserang kubalon 

di makamaong mosulat) nga mohugot dayon 

akong kinuptan sa Dragon, 

mabali dayon. 

Talhan ko na usab sa di pa mopadayon 

ngadto nas borrow one-cannot be. 

Kalisod bang solbaron, tawgon ko kaha 

si Mama kay lihiro kadtong manukli 

samag calculator, mata-matahon rang 

kilos danggit ug pirit. 

Sakto akong inahan nga makabrayt 

ang lapis Dragon. 

Sa di pa ko mosulat, akong hinuklugan 

ang akong sulaton kay ang eraser niini 

makabuslot og papel. Dili sama sa Monggol 

nga pulido mopapas sa mga butang 

nga nahisulat na. Bulahan kadtong manggamitay 

sa mahalong Staedtler, dunay pares eraser, 

sakto mopapas, ug gayud may kahumot sa nangka. 

Inig abot sa Biyernes, hiapsan nas gitas-on 

sa akong mga tudlo ang lapis Dragon. 

Usa ka higayon niana, 

dunay gipasulat among maestra. 

Hinayhinay kong nagsulat kay nagdungan 

og hingohingo ang lapis ug ang akong ngipon. 

Intawn paabta kos kataposang pulong, 

ampo ko, nga dili mahulbot ang tumoy sa lapis. 

Tuod man, sa wa ko pa hituldoki ang pulong “kalayo,” 

nakabugwak pa sa kataposang higayon ang Dragon. 

 -- JANUAR E. YAP 

Talisay City, Cebu, Philippines