Han mga gamhanan
Kun hin-o an angay basulon,
Kun kay ano
Gintubuan hin mga pako
An ira mga anak
Ngan nagkalupad
Tipagawas han tangkal
Han ira mga ekspektasyon.
“Ito man! Hira!
Mga iya ni Satanas!”
Sugad han mga kadaan
Nga Saserdote,
Ginhukman nira
An mga magturutdo
Nga ighulid ha kalayo
Katima pamutli hin ulo.
“Gintatagan niyo
Hin mga bunga
Nga makalilisang
An amon mga anak,
Asya nagpapakiana,
Naato, nababay-og
An amon mga balay,
Nababalikad
An amon mga utok,
Natutunaw an mga bulawan
Nga amon ginhahakop
Ha amon mga inop!”
Ngan ginpamutlan hin ulo
An mga magturutdo.
Ngan inabat han mga gamhanan
An pagkabaraan.
“Maupay, maupay,
Malilipay an Ginoo,
Nahibalik an han-ay
Nga kabutang han nga tanan”
Pagkita nira ha gawas
Han palasyo,
Nasusunog an syudad.
Nag-arabot an mga demonyo
Ngan waray na kami
Makakiwa nga katawhan
Nga nanhahangahang
Ngan lupok an mga agtang.
Nag-inampuon an mga gamhanan
Nga panagan hira hin pako
Samtang nagkakalayo
An utod nga mga liog
Han mga puno han kinaadman.
-- KENNETH ALVIN CINCO
Salcedo, Eastern Samar, Philippines
No comments:
Post a Comment