tugon

Ata, ay hiton pagproblema 

Kun mahiuuna ako ha imo 

Pahimui hin bobon bis' ano 

Iton oryentasyon-- east-west, 

North-south, tipaubos ha 

Takilid nga tuna, OK la iton 

Ha akon. 

Pabay-i nga lumanay ha dagat 

An tubig han madudunot ko 

Nga lawas. Pabay-i nga dad-on 

Hiya han Leyte Gulf ngadto ha 

Este bas' makig-uyas ha mga 

Magdaragat han karisguhan 

Nga wara ko gud pag-agii. 

Di manggud ako hadto sugad 

Kamalangoy kan JL, kamalurop

Kan Mang Jay, kamaungod 

Han Kokoy. 

Kun hingada hin patag an bobon, 

Ayaw sementuha, lugod tamni, 

Tamni hin sudyang. May similya 

Nira ha Iberan. Siring ni Mr. Nabong 

Mas madig-on ini kontra han 

Bagunito ug naga. Kun makarisiko, 

Bis' daw ini mahulos di na makiwa. 

Lain la, mataghom daw ini ha 

Taludtod pati ha bitiis ngan paa. 

Kun makaturok na, atamana gud, 

Bantayi, pabay-i nga humitaas, 

Ayaw anay pagpudla. Kun baga 

Tugasan na ngan magkaabot pa 

Kamo, hala igpapulod ngan himua 

Nga tabla. An tabla igsalog ha at 

Katri bas' may kadirig ka pirmi. 

 -- ERIC ASEO 

San Julian, Eastern Samar, Philippines