tukwaw

San gutiay pa ak’ 

diri ak’ nahingangaturog 

pagpininsar san akon minangnuan 

nga ugang ug siwo 

sa amon luyo 

labi kun nasiburog na 

an tukwaw 

dida san paghuyop 

san habagat. 

Yana nga amay na ak’ 

mas labi nga di ak’ nahingangaturog 

san akon ugang ug siwo 

kay waray pa humuyop an habagat 

nagtikang na an tukwaw. 

An ugang madali bilngon, 

pero an siwo maiha padakuon. 

Nano na man la an kalipayan 

san nagmamanukan kun an imo 

minangnuan mahahanaw 

sa usa la nga pagpirok san tukwaw? 

San ginsusurat ko ini nga siday 

lumahos na usa ka milyon 

an gintukwaw san Covid 

sa bug-os nga kalibotan. 

Lahos na liwat singkwenta kayukot 

an mga napukan. 

Diri ak maaram 

kun may katalwasan. 

An tukwaw la an naglalarang 

kun an ugang, siwo o bisan an higot 

iya igtutubyan. 

 -- HAROLD L. MERCURIO 

 Calbayog City, Samar, Philippines