alegorya sa panimalayng giputlan og kuryente

Niadtong gabhiona, wala nakigtigi 

ang mga suga sa dakbayan batok 

sa kabituonan. Nagbuy-od ang kahilom, 

niangkon sa kadulom. 

Nilili ka sa bintana, ug natanggong 

ang tambilagaw nga bulan 

sa imong mga mata. 

Sa lamesa, nakig-anggid ang kandila 

sa luha. Ug samtang ginabaid sa kangitngit 

ang gakinto sa pabilo, ginabinat sab 

sa kahayag ang nagukoy-ukoy mong anino. 

Niadtong higayona, tingali nakapangutana ka 

kon nganong ang inyong panimalay 

nanimahong minteryo. 

 -- IVAN RIDGE ARBIZO 

 Davao City, Philippines