“maabo ka na, Palito!” pagdaob sa iyang singhag.
daw nipula ko sa silab sa kalibog
og unsaon pagkaabo sa napawong
dihang gumikan sa paglabtik-tayhop,
nipauli sa nilambuyog nga pabilo
ang nibiya kaniyang kahil
sa liboan ka litik-dagkot.
apan napagngan og kalayo sa tungang gabii
ang minetros kong silingan nga pabilo.
gikulata sa mga aligato
gikan sa akong giugbokan
ang puy-anan niyang pulang lampara
nga nihandos sa kaniadto itom nga kandilang
niturok sa akong abuhan
dihang giugbok ko didto
ang dinagkotan kong lawas
nga gikawatan og kalayo
sa nilambuyog nga pabilo.
oo. malambuyog niya iyang lawas.
uban ang iyang puy-anan.
dili kuno kini mabuak
ug siya kuno dili maabo.
dili pod malaya
sama sa niturok nga kandilang itom
nga naibot sa paghandos sa pulang lampara.
sagdi lang.
kay padulong na ang pagkurog sa kahil
ug pagkalambid sa molambuyog
kay gihaling na ang pagsilaob
kay ang itom nga kandila ug ako
human sa pagkulata sa lampara
karon, pula na!
-- DESIREE L. BALOTA
Talisay City, Cebu, Philippines
No comments:
Post a Comment