laksot

Mokilab sa pundiyohan sa langit diin 

Namungingi sa mga gaway sa gabon ug mitungtong 

Didto sa tinagoang panganod  

Ang bangaw, gapasundayag sa iyang lubog 

Nga katahom. Ang luminarya sa ampoanan 

Sa mga templo nga gikulit sa dakong panas sa Sugbo 

Yanong nanghingilin sa mga sugarol nga engkanto 

Sa Parian ug Colon. 

May tinagoang pangadye ang mga sutil 

Sa giwang sa ilang diyutayng pangaliyupo, 

Gianod sa dagayday sa mga takna 

Ang kakulba sa ilang kabalisa,

Kataslak sa ilang kaikag.

Kinsa'y manubag? Kinsa'y takos nga basulon 

Nga sa lantong handuraw 

Blangko ang buot ipasabot sa giihiang manuskripto 

Sa mga mambad nga pilosopo. 

Ang gisulat nga tanghaga nga gikuriskurisan 

Sa bungi nga magwawali sa silaba 

Sa berso sa kataspok? 

Unsa kalantip ang kalimot nga kini motapos man 

Sa tanan? Sagabay sa lisod na maletra nga kahulogan, 

Kinsa'y mosuwat sa laksot nga balak 

Sa wa'y kataposang urom? 

-- LEONEL QUILLO 

Malalag, Davao del Sur, Philippines