paglakát mo nag-lipstick ako hin pula

Diri rósas 

nga naparáyaw han binabayí 

nga kamalúya.  

Diri gihap’ coral 

nga pagpalábsag basi magmahúsay 

it kaisugón.  

Pula gud, 

maríbhong, mataróm nga pula 

kay diri ko pupúgngan 

an daganás han dugo 

nga padayon nga naáwas 

ha akon mga ugat. 

Diri ko tatágan hin katagbáwan 

hi Kamíngaw, an akon maiha na nga sángkay, 

hin pagtapô ha ak nga malúya, 

madú-as ngan masulúb-on. 

Diri ako matúgot hin waray ibá kundi 

malipayôn nga pakigbálik. 

 -- MA. CARMIE FLOR ORTEGO
Talalora, Samar, Philippines