ang hagawhaw nga utnga sa utin ni harvey weinstein

Rakrakon ang huni sa harana. Lagubo gihapon, bay! 

Labi na’g igo ra natong iluom kining lanog 

sa atong kaihalas— kining bitin nga gapalugway 

sa gikubalan nga dila sa butakal. Kining banog 

nga gadagit sa santilmong natidlom 

sa atong pus-on. Kanus-a man tawon ta malup-og 

sa laylay ni Circe? Unsaon nato pagbuak ang urom— 

labaw pa’g Mount Rushmore ang kabaga’g 

nawong— nga gasamin sa gaaso nga katahom? 

Kinsa nato ang takos motuok sa tuko nga gatangag 

og tirador nga kilat, ug dili moluhod 

sa emperador nga dugdog bisan pa’g mapangag 

ug mapikot ta sa bun-og sa kaulaw, dili motalikod: 

moyamyam ug mosilaob sa gainday-

inday nga katugnaw, moangkon: Ako gyod! Ako pod!


-- MICHAEL U. OBENIETA
Topeka, Kansas, USA