tungang gabii sa san pedro

Sa di pa padayong motikang ang mga tiil sa orasan, 

tagbawon sa kilumkilom ang dakbayan-- kining 

nabati nga kampana. Kon nganong layo pa ko, 

di ko kaingon. Ug kon nganong tugbang 

sa imong kalimutaw ang mga posteng 

nalabyan nako. Kon nganong masaag ko kanunay, 

di ko kaingon. Ug kon nganong tanang buot kong 

ibutyag nimo nagkaguliyang sama sa mga sakyanan. 

Inig hunong nako sa eskina, basi'g labyog gihapon 

ang kahait sa kadulom hangtod kandadohan 

sa kahilom kining akong pagbagting. Nakauli na ko. 

-- IVAN RIDGE ARBIZO
Davao City, Philippines