(Winaray nga hubad sa ‘Not All Poems Sing’ ni Merlie Alunan)
o nabuklad huyang ha adlaw daw bukad o daw sugad han langit nga nabitad
luyo han mga tamsi nga nagkakalpad
o sugad han tuna nga nasalod han bunok.
An iba hito ha ira, nakataklob,
usa ka lugas hin baras nga mahugot
waray bis inulang hin kasanag
tikang han bulan o bituon nga makakasuhot,
Nakirugtol, sugad hin bato nga nautok.
Diri tanan nga siday nakakaglaygay
lugaring nagtitirok ha ira sulod
an kamingaw nga daw mga lawod,
diin may nahuhurma nga mga bagyo,
ngan may nalutaw nga mga barsa hin mga inop
nga napakyas an pag-ininop, daw nag-aalipuros
nga pagbati han kuhol nga pinirit
pagprisoha dida han iya balayan,
daw kinaadman han isda nga nahangahang
waray pirok-pirok nga natutok
han kawaray katubtoban han kadagatan.
Iton usa nga siday, waray gud man ginyayakan,
kun di an imo na daan nahibabaroan,
o an imo mga nahibaroan nga ginbayaan, o an mga nalimtan
hasta ngadto-ngadto han tiarabot nga katulinan,
daw karubkob han nagkakadudugmok nga mga bukog
han mga karabaw, karnero ngan kabaktinan,
o an imo mga pakigbisog hin pagpuasa
ha mga panahon nga ikaw naghuhura.
Sugad man gihapon han imo pagtinghak
tungod han imo paglinanat han murto
nga imo gintawag tikang dida han rosas
ngan asul nga masilhag-- diri mo la gihapon
hiya madadakpan, ngan diri man hiya mahunong
para ha imo bis' ka pa mamur-ag hin kauhaw
o madismayo ngan mabarian hin paa
dida hit ligid hit karsada.
Ada kay, hala, kadto-a, ayaw papugong.
kawata tikang ha hangin an mga aso
han iya murto nga mga laygay.
Kay an dadlagan hin paglinanat
asya an nagdadara hin kalipay--
hinumdomi la ha kanunay,
diri tanan nga siday nalaygay.
-- KENNETH ALVIN CINCO
Salcedo, Eastern Samar, Philippines
