dili tanang balak mokanta

(hubad sa ‘Not All Poems Sing’ ni Merlie Alunan)

o mobukhad hangad sa adlaw sama sa mga bulak

sama sa langit alang sa gatadlas nga langgam
sama sa yuta alang sa uwan. 

Ang ubang balak gatak-op, 

usa ka lugas sa balas sa kahip-ot 

walay kahayag sa bulan ni sa bituon 

ang makaduot O nakumo 

daw bato gapugong sa kaugalingong ginhawa. 

Dili tanang balak mokanta apan nagatigom 

sulod niini mga lawod sa kahilom, 

mga taliabot nga bagyo, mga gakit sa pangandoy 

nga naanod, nabulibol nga kadasig sa suso 

nabalhog sulod sa iyang kabhang, 

kinaadman sa isda nga gatutok 

wa’y pagpamilok sa kalapdon sa dagat. 

Ang balak wala man gyoy buot isulti 

apan kon unsa nay imong nasayran, 

o nakat-onan, o nakalimtan 

latas sa mga kaliwatan, naglagutong 

mga bukog sa kabaw, kordero ug mga baboy, 

imong tinggutom sa mga panahon sa kabuhong. 

O nakubsan sa ginhawa samtang 

naggukod sa kalag sa hinigugmang gipukaw 

sa rosas ug sihag nga bughaw—dili nimo 

siya madakpan ug dili siya mohunong tungod nimo 

bisan pag mamatay ka sa kauhaw o matumba 

nga napiang daplin sa dalan. 

Padayon, padayon, gukda siya, sa walay paghunong, 

sakmiton ka sa kuyamoy sa hangin dala sa iyang malamatong awit.

Ang paggukod kabahin sa maong pamaagi--

kay hinumdomi baya, 

dili tanang balak mokanta.

 -- MANUEL M. AVENIDO, JR.
Fukui, Japan