paghikalimot

Nakahinumdom ka, ug nangalisbo 

ang dagat sa imong pagginhawa. Galawod

ang bakikaw nimong paghunahuna  

kaniya, wa’y kalainan 

sa mga baruto nga gatuya-tuya 

sa dagat. Saksi ka kon nganong di undangan 

pagkab-ot sa mga bawod ang mga panganod. 

Gapungasi ang hapak sa dagat, hapdos 

sama sa paglatos sa hangin sa imong panit 

hangtod gabukal ang kabugnaw 

sa imong dugo. Gilok 

nga gisubay sa mga balas 

ang mga abenida sa imong lapalapa. 

Sa tuskig nga puno-an, gabitay 

ang dubok nga isda kansang 

mga mata galurat, gidugokan 

sa mga lagong. Gatinutokay mo, ug

kalit lang nitaob ang dugo 

nga mikapyot tumoy sa imong gikuptang

tayaon nga kutsilyo. 

 -- IVAN RIDGE ARBIZO 

 Davao City, Philippines