“He portrayed himself as the avenging prince…”
-- Sheila Coronel, The New Yorker, May 17, 2022
Tanan nga istorya han mga anak han bao puro hangin
Awit nam’ kamatuoran sugad han hitso nga sukol hini nga laygay,
Dayawa an anak han ungod nga nagparabong han saging!
Upat ka dekada nga panguwat han darag nga mga sigbin
Gintawag pa nga ‘diktador’ an tuod nga nagdara hin upay
Tanan nga ‘storya han mga anak han bao puro hangin
Maaram na kami han kamatuoran kay an dapit kun diin
Gintanom an rumabong nga saging am’ ginkuno-kuno tiupay
Dayawa an anak han ungod nga nagparabong han saging!
Inosente kuno nga kamanampan ngan mga bao – pinanstraping
Ginpriso kuno an kagawasan ngan ginkawat daw an kalipay
Tanan ini nga istorya han darag nga mga bao puro hangin
Kawatan daw an amo; an bao – may saging ba nga ginbilin?
Gin-guom an saging nga namulawan ngan an amo gintinamay
Sanglit, yana nga aadi na an anak, kita tanan magkakasaging!
Buligi ta nga magin pangulo nga anak han amo basi bumalik magin
Kasagingan an aton nasod. An dugo nga waray kabaydi, igbaliwaray
Kay tanan nga istorya han mga anak han bao puro hangin,
Darayawon an amo kay uunahon kami pagtagi hin saging!
-- KENNETH ALVIN CINCO
Salcedo, Eastern Samar, Philippines
No comments:
Post a Comment