artoro taliwis

Ikatatlo nga henerasyon sang mapagros 

nga mga toro nga nagma-oy sang gintilawan 

nga kaponon ni Tiyoy Doming. 

Kabalo magpa-atras sang karo kun 

hampakon ang iya talinga, nagaluhod 

kun sakyan kada aga.

Si Artoro nga sarang tani matapa 

ukon mapata, kagina sa amon pagtulokay 

kag hinuna-huna nga istorya, hinali nga nagmustra: 

Amoy, kun wala na man gid sang pag-asa ining aton banwa, 

tugoti ako nga magpadalagan nga kongresista, 

isulat sa aton plataporma – mabuot, mapagros, mapisan, 

magaserbisyo sa tig-ilinit ukon tig-ululan, indi kinahanglan 

nga bayuan, indi kinahanglan paliguan, indi kinahanglan 

bantayan, indi kinahanglan suweldohan. Indi palahambal 

pero hangkilan sa pagpamati, makabati kag makapanimaho 

maskin yadto ka sa piyak nga bukid.Sa matambok nga hilamon 

pwede na mangin malipayon, bastante sa pagpaino-ino, 

karabaw nga daw tawo. 

Kay ano man lang bala ang pag-ubra sang layi, 

indi bala duha ka bagay-- oo ukon indi. Kun ano gid man 

nga may dilema nga dapat desisyonan, diri sa akon 

sungay isab-it inang tarahan, kag saksi ang langit kag 

ang duta, gikan sa akon katigulangan kag mga mangunguma 

nga nangin halos himata, balansihon naton inang sitwasyon 

sa pagduko ukon sa pagtanga. 

Amoy, kay sa akon paglantaw nagasuli ang aton kalibotan, 

kami nga mga sapat nagaamat-amat nga mas nagatawo, 

kag kamo nga mga tawo, mas nagasapat. Kinahalangnan na 

siguro kami sa konseho, para mas may tul-id nga makapadangat 

kun ano gid ang matuod-tuod nga sitwasyon sang aton duta, 

suno sa aton adlaw-adlaw nga pagtinguha. 

-- JONATHAN D. DAVILA 

Bacolod City, Negros Occidental, Philippines