liwan nga nagbalik ang panong sa mga pispis sa amon atop

(para sa mga taga-Barangay Rempes, Maguindanao) 

Pagkatapos sang malawig nga pag-ulan, 

liwan na nga nagbalik sa atop 

ang panong sang mga pispis. 

Ila ginwaragwag ang madinalag-on 

nga pag-abot sa pagkiskis 

sang ila kuko sa tuktukon nga salsalon 

nga ginlubong sang mga panabang 

sang naglubog sa pagkabalaka 

ang bug-os nga Barangay Rempes. 

Ugaling sa ugsaran ni Inday Linda, 

nga ang kalayuon sa amon pulo ka dupa, 

rosal kag santan lamang ang liwan nagbalik 

kag nagwaragwag sang makatalanhaga nga kaamyon: 

daw subong sang mga kandila sang iya pagkawalà. 

Kag niyan sa igsilinghot: mayami, masimhotan 

ang mga bulak nga daw kanaryo sa kasanag, 

nagalapos sa nahaw-asan nga mga dahon 

pagkatapos magsungka si Paeng 

kaupod ang kalag sang isa ka pamilya 

kag mga uyas sang kalan-on nga wala maglitik 

nga iya ginsilhig padulong sa bibi 

sang mga banglid, sa mga gumon nga bakulod, 

sa ulihi nga mga baryo nga ginapatihan 

isa ka madanlog nga purgatoryo. 

-- ADRIAN MEDINA PREGONIR 

Banga, South Cotabato, Philippines