kang raimund sab gihapon, paglabay sa pito ka tuig

Ayaw og ilabay sa sapa
ang akong gihimo nga bangka
nga gama sa papel
ug sa mga titik nga nagtiniil
gikan sa nagdugong' kasingkasing
nga nagbitay sa tumoy sa saging
sa haw-ang nga nataran
nga imong gibiyaan.
Ayaw ibahog sa basurahan
ang mga lapok nga kaang
nga akong gisudlan
sa mga istoryang kataw-anan
nga maoy naggitik kanako sa dihang
ang yuta nga akong gisakyan
nibuka og gilamoy
ang katawa ning kalibotan
bisa'g unsaon nako pagsampit
sa imong ngalan--
ayaw pagtubag kay aron
makadungog lang gihapon
ko sa agik-ik sa langit
nga giputos sa kangitngit.
Sa akong bahin--
gitipigan ko gayod
ang mga bangis nga balod
nga imong gitulod
sa akong panganod
gitipon nako ang mga dalugdog
nga nagdahunog
kuyog sa unos
nga maoy nilumos
sa danguyngoy sa alimukon
nga walay sangang mabatugan
bisan sa kadaghan sa kahoy
ning kalasangan
sa kasakit sa mga nakurat
nga singgamayon
kinsa nahigmata, gawas sa sapa
ug sa dangog nga lumot
nga mora og nahimuot

Kay hangtod karon ang haw-ang
nga nataran
nga imong gibiyaan
naghandom lang gihapon
sa pagtuyok ning kalibotan.

-- MARIA VICTORIA BELTRAN
Cebu City, Philippines