Sa pagpadulong namo sa Singapore
Nalangan ang among paglupad
Tungod kay usa sa mga pasahero
Nagsukasuka sa kahubog
Sa iyang gahom pagkakongresista.
Sa pagtugpa namo sa niaging pasko
Didto sa Ninoy Aquino International Airport
Among nasugatan ang mas daghan
Nga mangluparay nga mga Pilipino
Mga nurse nga padulong molupad sa Europe
Mga engineer nga padulong molupad sa Middle East
Mga magtutudlo nga padulong molupad sa Australia
Mora mi'g mga hulmigas nga nagsugat
Padulong pasulod pagawas sa Pilipinas
Apan nababoy mig hapit usa ka oras
Kay giuna pagpagawas sa Ninoy Aquino International Airport
Ang presidente kauban ang mga higanting negosyante
Nga gikan kuno sa opisyal nga lupadlupad
Sa tinipong bansa sa America
Ug sa paggawas namo sa Ninoy Aquino International Airport
Nisugat kanamo ang higanting billboard
Nga gibansiwag ang higanting pahiyom sa presidente
Nga nag-abi-abi sa pag-abot sa mga bag-ong bayani
Mga bag-ong nangabot nga daw mga salin sa nahurot.
-- LEO BOB FLORES
Bukit Batok, Singapore
No comments:
Post a Comment