utlanan sa imong kalibotan

(alang kang Papa)

"The tree grew, and was strong, and the height thereof reached unto heaven, and the sight thereof to the ends of all the earth." -- Daniel 4:11(KJV)















Niadtong gisulod ka sa ICU nihunong
pagpitik ang orasan sa akong kalibotan.
Nanglimbawt akong balhibo sa huyohoy
sa hangin, gihatod atong gipanig-ingnan
nimo sa imong kalig-on sa kaugalingon.
Kadto ganing giingon nimo ang imong
kinabuhi sama sa kawayan, nga bisan
unsaon pagkusokuso sa hangin dili gyod
mabali, mohawok na lang sa yuta apan
dili gyud maluka. Kon maayo ang panahon
mapagarbohon nga mobarog paingon
sa langit. Niduko lang gani ka sa akong
ka pilosopo nga ang kawayan dili kahoy
kon dili, kini klase sa usa ka balili.
Ambot ba, Pa, nga bisan og di-a na ko
sa Amerika madunggan man lang gihapon
nako ang pitipiti sa mga kawayan matag
huros sa hangin sa tingtugnaw, niadtong
gisulod ka sa ICU ug nihunong pagpitik
ang orasan sa imong kalibotan.


-- NOEL D. RAMA
Clinton, Maryland, USA