yamyam sa maglilimot nga may tinaguang aligutgot sa minatay

hoy, goryo, tagui tawn nang imong baho
mauwaw tas mga bisita. ikipi pag-ayo
nang mga bukton aron anghit ug angso
di mangalisbo. hala, sutoy asang ispidno
kanang imong espirito ibutang sa ginoo.
di ni hingilin, ayaw nag panamilit namo,
kay ubay-ubay baya kag gibiling milagro.
ug igo sad gyung dili mi kalimot nimo
mopuli na lang mi diha sa imong pwesto.
sus, katorsey gibiling liwat, ispoko mo,
intawn, ang pito gagmitoy pa ra ba kaayo.
unsa man gyud diay imong plano, goryo,
magtukod og kaugalingon nga baryo?
inay, tulo mo ka asawa gatudlo-tudlo
kung kinsay mobayad sa lungon ug nitso.
ni nahot, ni usa ka dako, wa kay pinundo.
maong utang buot, tagui imong baho,
aron limos nimo ayawat na lang mapuno.
sigun ni inse bebang, limti na lang kuno
utang mo sa tindahan. si pare nimo tonyo
lang kunoy tapal sa imong mga tinanto.
ug ang diyos na lang say paigo nimo,
sa wala mo pagpangayo nako og pasaylo
human sumsumi binuhian kong pabo.
pero, nganong hasta pinangga kong iro
imo man sad gidiskitaag sud sa kaldero?
lihay, goryo, din-a ko kaagwanta nimo.
um! da, wingig ka lagi. sukol ka nako?

_____________________________________________________________

* Sama sa albularyo, manghihilot ug manalagna, ang maglilimot kay usa ka propesyon sa karaang panahon sa Kabisay-an. Ang ritwal nga gitawag og "limot" kay ipahigayon kuyog sa pag-imbalsamar sa minatay. Ang maglilimot kay kasagaran mga babaye ug ang ritwal naglangkob sa pagbutang og luy-a, gapas ug unas ilawom sa patayng lawas dayon og yamyam ngadto sa minatay sa paghangyo og tago sa iyang baho. Matud pa sa maong tinuhuan, kung ang patay manimaho gani sa haya, nagpasabot nga daghan gihapon kinig kontra o kaaway.


-- ADONIS G. DURADO
Bangkok, Thailand