oda alang sa daan kong sapatos

(Uban sa pagpangayo kog mga pasaylo kang Pablo Neruda)

Sa akong mga tiil
Dunay usa ka parisan
Sa daang sapatos–
Yano, way pagpakaaron-ingnon
Sama niadtong
Way ngalang mga kamot
Nga mitahi kanila.
Duha sila ka kasaligang sulogoon
Nga molukdo
Sa gibug-aton nga akong gilukdo
Ug nakaila
Sama sa way laing nakaila
Sa akong mga tiil.
Ilang giduog
Ang mga kulamoy
Sa akong mga tinguha
Giliyokan
Ang mga tikod
Sa akong mga kahadlok
Gituko
Ang mga kitin
Sa akong mga pagduhaduha.
Mouban sila
Nga way pagpamalibad
Bisag asa
Ang buot kong adtoan –
Taak
Sa abog
Sa lapok
Sa hait nga kabatoan.
Karon
Ning katapusan
Ko kanilang paghuswa
Pagbadbad sa mga liston
Sa among pagpanag-uban –
Giabot ako
Ning dyutayng
Pagkawili.
Kay karon
Ko lang mabati
Nga wa diay
Laing makapuli
Paghaom kanila
Gawas ning mga tiil
Sa akong pagsalig.
Ug
Wa diay
Ako’y ikabalos
Sa hugot nga gakus
Sa tiunayng pag-amping
Nga ilang gihatag
Sa akong mga tiil
Hangtod
Ning tumang higayon
Nga sa way pagpanamilit
Sila
Ug ang akong mga tiil
Hingpit
Sa ilang
Katapusang panagbulag.


-- URIAS A. ALMAGRO, M.D.
New Berlin, Wisconsin, U.S.A.