sakto si rexroth

"Nia nya ko sunod semana puhon, 'Ga," nimo pa nga nagbaat
sa liston sa imong sapatos. "Puhon," midason siya, pero wa siya
moyanghag. Ang iyang tingog estrikta apan way kinabuhi.
Mitindog siya ug milantaw sa gawas, diin paspas
ang dis-og sa kilumkilom. Pasalig mo, "Segurado lagi."

Morag dili tingali. Nahibaw-an lang nimo niadtong adlawa
Nga naaprobahan na gyod ang imong bisa paingon sa Amerika.
Makaingon baya ta nga usahay mogamit ta sa pulong "puhon"
aron dili kaayo hait paminawon ang atong bakak,
dili tungod kay atong gitugyan ang tanan sa pagbuot sa Diyos.


-- VICENTE VIVENCIO BANDILLO
Dubai, United Arab Emirates