pagpangita kang duncan o'gilvie

Mil otso sientos singkwenta
Sa dihang kuyog sa imong maleta
Nidunggo ka niining isla
Dinhi sa Southeast Asia.

Ang akong ulo nakutaw
Nganong dinhi naglutawlutaw
Ang estrangherong naibog sa kataw.

Kay wala man ka nagnegosyo
Wala man usab mangusyuso
Matag hapon naglingkod kuno ka
Didto dapit sa kusina
Sa ngilit sa dagat sa Dauis
Nagpagawas sa imong kandiis.

Salamat, lolo Duncan,
Nga ang kinabuhi imong gitiawan
Kay gikan sa imong liso
Ang upat ka tanom nangalisbo--
Usa sa ila si Lola Salud,
Ang kanhing babaye sa balod
Kinsang mga mata lawom ug asul
Busa dili ka angay magbasol.

Apan kining sanga nga nanalingsing
Panagsa, ang kasingkasing
Motiaw og maghandom
Sa mga damgo ug paglaom
Sa iyang lolo sa sungay
Nga sa karaang panahon--
niining isla, nilabay ug nikiay.


-- MARIA VICTORIA BELTRAN
Cebu City, Philippines