samtang giluok nila ang mga gutlo

(alang sa duha ka itom nga nakakuha og pagtagad sa akong pag-inusara sa Surratts-Clinton Public Library)

















Gisabak sa usa ang usa sa lingkoranan,
atubangan sa ilang gihulamang computer.
Gahiwidhiwid ang duha, gasabak sa ilang
mga kahigwa-os nga sa akong paminaw
galugnot-lugnot sa ilang mga pus-on,
sa pagtuo nga angay na gyong hiusaon
ang ilang kahilom, samtang maayong
pagkasuksok ang ilang mga sungay ug ikog
sa bulok sa buho sa matag pamilok sa gutlo.
Sa akong pasiplat, kon wa lang ko masipyat,
nag-search sila og mga motels, tingali aron
ilang kalumloman ug kapahungawan sa ilang
alisngaw. Naglain akong kabuhi sa kabugnaw
sa ilang mga hagawhaw, tingali, sa kahinugon
pud sa ilang kabatan-on. Nidalikyat kog barog
ug nidangop sa Magazines & Newspapers Section
ug gipaklipakli ang mga panid sa Washington Post
sa pamasin adunay init nga mahanggap kabahin
sa Beijing Olympics o di ba kaha ang panagtigi
nilang McCain ug Obama sa politika. Wa pa may
makapaukyab gawas ni Phelps nga nagpusnga
karon sa kasikat tungod sa pagkakusog molangoy.
Nibalik ko sa akong gilingkoran sa computer # 8
ug didto pa ang duha sa tupad mora nag mga luag
nga roska sa rampa sa ilang mga kaugalingon,
nag-agik-ik sa tumang kahimuot kay naka-reserve
na diay og kwarto sa Motel 6 sa District Heights.
Tuod, ang halok nitiurok taliwa sa kagilok sa ilang
kahimatngon, dayon nilag barog human og log-out
sa computer # 7. Gisabak sa usa sa akong hunahuna
nganong wa man hapita ang duha ka itom sa puti
nga librarian nga gabahas-bahas ngadto-nganhi?


-- NOEL D. RAMA
Clinton, Maryland, USA