ang imong mga balak

gamhanan gayod ang imong mga
balak
higala ko
sa mga panid sa pulong dagitab

gibasa ko kini kaganiha
sayod ka
gibasa ko na usab kini karon
sa akong pag-abot
halayo sa kagubot

nakakita ang mga buta
nakayubit sa mga pulong ang mga amang
nakasayaw ang mga bakol sa katahom sa imong mga pulong
nakadungog ang mga bungol

nahingangha gayod ako
sa mga kausaban sa tanan
nahimong bino ang mga sapa
sa akong tiilan
nahimong pan de sal ang imong
lawas nga kaniadto
patay na
ug ang imong mga bukog wala
gayod nila maputol
bisan pa sa ilang mga kasilag
ug sa kasuko

gibasa ko kining imong balak
sa makatulo
ug mipiyok baya ang manok
ni san pedro

mipahiyom ka higala
karon nagmalipayon ka na
kay ako nakaamgo na
sa kagamhanan sa imong mga linya

ug karon tugiti ako nga
mangutana

kon kining tanan gikan ba sa kinailawman sa imong kasingkasing?


-- RIC S. BASTASA
Katipunan, Zamboanga del Norte, Philippines