duha ka kawatan

Ang pagpamalak, matod pa ni Billy Collins, usa lang ka laing paagi
Sa pagpangawat. Ako – syento porsento – nga mouyon.
Apan, sa akong paminaw, dili kini sama sa pagpangawat
Nga naggamit sa maskara ug flashlight nga iyang giingon, kondili
Pagpangawat nga sama sa alibangbang ug ligwan nga nangawat
Sa mga bulak. Hinoon dili man daghan ang manulat og mga balak
Mao nga dili daghan ang mga kawatan ning kategoriyaha.
Sa banabana ni Wislawa Szymborska, iyang naabot nga tingali
Sa kada libo, duha ra ang mahigugmaon sa pagpamalak. Ah,
Dunay daghang moingon nga sila mahigugmaon sa pagpamalak,
Apan (ug kini gikawat ko kang Szymborska), mas sama man usab
Nga sila mahigugmaon sa pagprobar sa ilang mga punto o
Pagpikpik sa ilang iro. Uban ning akong paghorar, moangkon ako
Nga ning uban kong usa ka libo, usa ako sa duha ka ingong kawatan.
Ug naghinamhinam ako pagpaabot nga ang ikaduha
(si John o si Jane Doe) magpaila dayon. Kay daku kong ikalipay
Ang pagtindog tupad kaniya atubangan sa bisan kinsa nga huwes.


-- URIAS A. ALMAGRO, M.D.
New Berlin, Wisconsin, USA