ang mga inisyal nga akong gikulit niadtong dakung punoan sa mangga

Napanas na ang mga inisyal
Nga akong gikulit niadtong dakung
Punoan sa mangga. Gikulit kadto
Sa maismais nga korta
Sa akong kabatan-on. Gikulit samtang
Ang adlaw mihapuhap sa mga dahon
Sa akong mga pangandoy, samtang
Ang langit ug ang dagat nanagtukma
Sa ilang kabughaw ug way mga balod
O mga panganod nga nakasabal.
Ang mga letra gisulod sa gamay’ng
Kasingkasing nga gitaroyan og baraw.
Kaha nanunga nga dunay umaabot
Nga mga kasakit. Gikulit kadto
Sa batan-ong kamot sa pagpamasin
Sa kamot nga pa makahakgom
Kon unsa man gyud diay
Ang iyang kuptan nga kalibutan.
Ay, ang pagkainosenti, ang pagkabata!
Hingpit na ang paghipos
Sa mga hunos sa kagahapon
Kadtong akong mga gibilin:
Lakip ang unang ngipon kong nahingo
Nga gisuksok sa liki sa dakung bato
Ang tirador nga hinimo sa gibakong
Nga sanga sa syapo, ang kasing
Nga tinigib ang lansang, ang yoyo
Ug kadtong napanas nga mga inisyal
Nga kanhi akong gikulit
Sa dakung punoan sa panahon.

-- URIAS A. ALMAGRO, M.D.
New Berlin, Wisconsin, USA