manghihilot

Sigon pa sa panumdoman
ikaw mao'y tigsunod sa balaan,
sa dugay nang nahikalimtan
nga banay sa mga tinahod nga babaylan

Kadtong gitumban
sa mga Katsila sa karaan
kay lagi gipulihan
sa doktor og pari nga sakop sa simbahan

Ang imong tambal; gamot
sanga, prutas og mga lumot
Ug ang mga paghinaot
nga ang kinaiyahan, layo ra sa sapot

Dugay na ang nilabay
nga kining akong nanay
nag-antos kay nagsakay
sa sakit nga kaniya kanunay gagaray

Aduna ka ba'y ikatabang
sa iyang pagsalimuang?
Kay ang bayranan dili na mabangbang

sa ospital nga among gisagubang.

-- MARIA VICTORIA BELTRAN
Cebu City, Philippines